Апеляцыйны суд у Варшаве пакінуў без зменаў прысуд грамадзяніну Польшчы Дарыяну С., асуджанаму за згвалтаванне і забойства грамадзянкі Беларусі. Мужчыну прызначанае пажыццёвае пазбаўленне волі, піша Tvn24.
У Апеляцыйным судзе ў Варшаве вынеслі канчатковае рашэнне па справе паляка Дарыяна С., асуджанага за згвалтаванне і забойства 25-гадовай беларускі Лізы ў цэнтры польскай сталіцы ў 2024 годзе. Раней суд першай інстанцыі прызначыў яму пажыццёвае зняволенне з абавязковым тэрапеўтычным наглядам, аднак асуджаны паспрабаваў абскардзіць прысуд.
4 лістапада гэты прысуд быў цалкам пацверджаны і цяпер канчатковы. Апеляцыйны суд заявіў, што разгляд быў праведзены правільна, а высновы суда першай інстанцыі абгрунтаваныя.
Абарона паляка спрабавала даказаць, што абвінавачаны не быў пільна абследаваны на прадмет яго стану ў момант здзяйснення злачынства, а судовы працэс нібыта праходзіў занадта хутка — прысуд быў вынесены менш чым праз год пасля забойства. Аднак гэтыя аргументы не пераканалі суд.
Паводле следства, у ноч на 25 лютага 2024 года Дарыян С. напаў на беларуску Лізавету Герцэн у цэнтры Варшавы. Ён прыставіў дзяўчыне нож да горла, згвалціў і спрабаваў задушыць. Лізу знайшлі без прытомнасці на лесвічнай клетцы дома № 47 па вуліцы Журавя ў Варшаве. Она памерла ў бальніцы Варшаўскага медыцынскага ўніверсітэта праз чатыры дні, 1 сакавіка.
Лізавету пахавалі ў Варшаве 15 сакавіка 2024 года. Праз тыдзень пасля забойства ў цэнтры польскай сталіцы прайшоў марш «Яе звалі Ліза» ў памяць пра беларуску.
Па падазрэнні ў замаху на забойства, спалучаным са згвалтаваннем і разбоем, паліцыя затрымала 23-гадовага варшавяніна Дарыяна С. Мужчыну ўзялі пад варту.
4 снежня 2024 года ў Акруговым судзе Варшавы пачаўся суд над Дарыянам С. Мужчыну інкрымінавалі забойства на сэксуальнай глебе. Яму пагражала ад 12 гадоў да пажыццёвага пазбаўлення волі.
На першым жа паседжанні Дарыян С. часткова прызнаў віну, але сказаў, што намеру забіваць у яго не было. Ён заявіў суду, што мусіў заплаціць 1600 злотых (1336 беларускіх рублёў) за кватэру, але грошай не было. Паляк хацеў абкрасці краму ці бар. У судзе ён заявіў, што ў адной з установаў убачыў украінцаў, думаў іх абакрасці, але ў выніку сутыкнуўся з Лізаветай.
17 студзеня Акруговы суд Варшавы асудзіў Дарыяна С. на пажыццёвае зняволенне. Яго прызналі вінаватым у рабаванні, згвалтаванні і забойстве 25-гадовай беларускі. Акрамя таго, Дарыяна таксама абавязалі выплаціць пацярпелым — брату і партнёру Лізаветы — па 200 тысяч польскіх злотых (каля 168 тысяч рублёў па курсе Нацбанка на 17 студзеня). Пакаранне мужчына адбывае ў тэрапеўтычнай турэмнай сістэме.
Выносячы прысуд, суд прыйшоў да высновы, што Дарыян С. дзейнічаў спакойна і разважліва — здзейсніўшы злачынства, ён сышоў упэўнена, забраўшы толькі каштоўныя рэчы Лізы. Дарыян С. прызнаў сябе вінаватым, але заявіў, што не хацеў забіваць Лізу.