Улады рэгулярна адзначаюць запатрабаванасць мігрантаў на рынку працы. На гэтым фоне прыток замежнікаў у нашую краіну расце. За дзевяць месяцаў у Беларусь прыехала працоўных мігрантаў амаль столькі ж, колькі за ўвесь 2024-ы. Гэта вынікае са статыстыкі МУС. Спойлер: амаль палова экспатаў прыпадае на адну краіну (і гэта не Расія), а ў топ-3 уваходзіць Украіна.
У студзені-верасні ў Беларусь прыехаў 32 381 працоўны мігрант. Для параўнання: за ўвесь мінулы год іх прыбыло 33 818.
З тых, хто папоўніў за дзевяць месяцаў гэтага года шэрагі работнікаў, амаль палова — 14,9 тыс. — грамадзяне Туркменістана. На другім месцы — Расія, адкуль прыбылі 3435 чалавек. Следам ідзе Украіна (2916). У пяцёрку таксама ўваходзяць Узбекістан (2593) і Кітай (2548). З кожнай іншай краіны да нас прыехала працаваць менш чым тысяча замежнікаў. У тым ліку 233 — з Пакістана.
Калі глядзець разбіўку па родзе дзейнасці, то самай вялікай групай былі кваліфікаваныя рабочыя прамысловасці і будаўніцтва — 10 587. Сферу абслугоўвання і гандлю папоўніла 6219 замежнікаў. Рабочыя, кіраўнікі і тыя, хто абслугоўвае абсталяванне, а таксама зборшчыкі вырабаў — гэта 5499 чалавек. Яшчэ 3379 — некваліфікаваныя работнікі.
Між тым афіцыйна працаваць за мяжу за гэты ж час з’ехала 2026 беларусаў. У асноўным выбіралі Расію і Польшчу. Адзначым, што ў гэтай статыстыцы ўлічваюцца людзі, якія працаўладкоўваліся праз афіцыйныя кампаніі і, адпаведна, паведамілі МУС пра выезд на працу.
Нагадаем, улады заклапочаныя дэфіцытам кадраў і рэгулярна адзначаюць запатрабванасць замежнай рабочай сілы на рынку працы. У Мінпрацы гэта аргументавалі таксама рэкордна нізкім узроўнем беспрацоўя і тым, што эканоміка кожны год стварае дзясяткі тысяч новых працоўных месцаў. А Аляксандр Лукашэнка раней спрабаваў дамовіцца з уладамі Пакістана пра арганізацыю масавага прытоку людзей адтуль у Беларусь.
Чытайце таксама
